كتبت /نور وائل
5/5 تاريخ محفور في دماغي من سنتين
الفنان سيد رجب حرفيا مش بس فنان لاء دا انسان عظيم
ختم مسلسل ابو العروسة بعيد انا بتمني يكون موجود كل سنة وهو عيد العيلة
طب لي ميبقاش فيه عيد للعيلة فعلا!!؟
عيد نتجمع فيه عشان نشوف بعض، نحكي مع بعض، نلخص لبعض سنه عدت من عمرنا
لما جيت اتكلم فالموضوع دا لاحظت ان كذا حد قال ان فيه مشاكل وخلافات بين العيلة، طب لي منحلهاش فاليوم دا
لو حاولت ترفع سماعة التليفون وتكلم قرايبك اللي فيه بينك وبينهم خلافات صدقني المشكلة والخلاف هيخلصوا
مفيش وقت للمشاكل والخلافات والحوارات محدش ضامن بكرا، كفاية خصام، كفاية تفكك عائلي، كفاية اي حاجه تبعد عيلة عن بعضها
فيه ناس عيلة الاب بالنسبالهم هي العيلة وناس بالنسبالهم عيلة الام هيا العيلة وفيه ناس صحابهم بالنسبالهم هما العيلة وفيه ناس قدرت تجمع عيلة من كل دول
انا بالنسبالي الفنان سيد رجب "عبد الحميد"قدر يجمع عيلة من كل دول اصحاب وجيران واسرة وقرايب قدر يجمعهم في عيلة واحدة وقدر انه يجسد الاسرة المصرية اللي مبقتش موجودة اصلا
عارفة طبعا ان زحمة الدنيا مخلية كل واحد مش عارف يبص وراه بس مش هيحصل حاجه لو اخدنا اجازة من حياتنا يوم واحد بس عشان نتجمع فيه مع العيلة ونحتفل بيوم زي دا
عيد العيلة فرصة كبيرة نقدر نجمع فيها لمتنا
نقدر نحل فيه كل خلافتنا
نقدر نرجع الشكل الصح والحقيقي للاسرة المصرية، الاسرة اللي لازم تكون موجوده في كل بيت.